વિકાસગૃહમાંથી બે યુવતીઓ નાસી

જામનગરના કસ્તુરબા સ્ત્રી વિકાસ ગૃહમાંથી બે યુવતિઓ નાસી છુટતા ચકચાર મચી ગઇ છે. ચકચારી ગેંગ રેપ પ્રકરણમાં સંડોવાયેલા શખ્સોની ગેંગના સભ્યો સામે સંસ્થાએ શંકાની સોય તાણી છે. પોલીસે સંસ્થાની યુવતિઓના નિવેદનો નોંધી શોધખોળ આદરી છે. બનાવ અંગે જાણવા મળતી વિગત મુજબ, કસ્તુરબા સ્ત્રી વિકાસ ગૃહમાંથી રવિવારે રાત્રે બે યુવતિઓ ભાગી છુટતા દોડધામ મચી ગઇ હતી. રાત્રે નવેક વાગ્યે સંસ્થા સંચાલિકા અને ગૃહ માતા સહિતનાને જાણ થતાં તાત્કાલીક પોલીસ બોલાવવામાં આવી હતી. બિલ્કીશબેન (ઉ.વ.૧૯) અને રાજુબેન ચૌહાણ (ઉ.વ.૧૮) નામની બન્ને યુવતિઓ સંસ્થાની પાછળના ભાગે આવેલી વંડી કુદી નાસી છુટયાનું સંસ્થા સંચાલિકા કમળાબેને જણાવ્યુ હતું.